Чăваш Республикин вĕренÿ институтĕнче 2015 çулхи чÿк уйăхĕн 24-мĕшĕнче шкул ачисен чăваш чĕлхипе литературине, культурине вĕренес кăмăлне çĕклес, чăваш чĕлхипе литературине, культурине тĕпчес енĕпе пултаруллă ачасене тупса палăртас, вĕсен пултарулăхне аталантарас тĕллевпе «Янра, чăваш сăмахĕ» республика конкурс фестивалĕ иртрĕ. Фестивале республикăн чăваш тата вырăс шкулĕсенче 3-6 классенче вĕренекен ачасем хутшăнчĕç. Фестивальте пурĕ 192 номер пулчĕ: «Сăвă чи лайăх калакан» номинаци – 91, «Чи лайăх юрлакан» номинаци – 61, «Чи лайăх ташлакан» номинаци - 18, «Чи лайăх сценка» номинаци – 22.

Çак фестивале хутшăнма кăмăл тăвакансем пирĕн районтан та пулчĕç. Варнарти 1 –мĕш шкулта 4-мĕш «а» класра вĕренекен Данилова Дарья куракансене «Вăйăра» ташăпа тĕлĕнтерчĕ. 6-мĕш «а» класра вĕренекен Клочкова Ксения  В. Тимаков çырнă, В. Салихова квĕленĕ «Кушак» юррипе, Çерпелти 6- мĕш класра вĕренекен Сергеева Камилла вара Петĕр Хусанкайан «Сăпка юррипе»  савăнтарчĕç. «Янра, чăваш сăмахĕ» республика конкурс фестивалĕн çĕнтерÿçисене жюри палăртрĕ. «Чи лайăх юрлакан» номинацире Ксения Клочкова  II – мĕш  тата Сергеева Камилла I – мĕш вырăнсене тивĕçрĕç, саламлатпăр вĕсене. Малашне те çитĕнÿсем тума ăнăçу сунатпăр!